गोदावरीमा १८८२ विद्यार्थीले आधारभूत तहको परीक्षामा दिँदै
ललितपुर ,स्थानीय सरकार सञ्चालन ऐन २०७४ ले आधारभूत तह कक्षा ८को परीक्षा लिने जिम्मेवारी स्थानीय तहलाई दिएको छ।
ललितपुरको गोदावरी नगरपालिकामा २०८० चैत्र १ बाट कक्षा ८ को बार्षिक परीक्षा सुरु भएको छ । १८८२ जनाले परीक्षाका लागि फारम भरेको वरिष्ठ विद्यालय निरीक्षक सुनिता महर्जनले जानकारी दिनु भयो ।उहाँका अनुसार परीक्षामा ६० विद्यालयको विद्यार्थीहरु सहभागी हुनेछन् । ७ विषयको परीक्षा सञ्चालानार्थ परीक्षा समितिले १४ वटा केन्द्रमा केन्द्राध्यक्ष निरीक्षक र सहयोगी गरेर ११८ जना जनशक्तिको परिचालन गरेको छ ।
नयाँ पाठ्यक्रम अनुसार कक्षा ८ मा यसै शैक्षिक सत्रदेखि ५० पुर्णाङ्कको परीक्षा सञ्चालन हुनेछ भने बाँकी ५० पुर्णाङ्क विद्यालयले आन्तरिक मूल्याङ्कनबाट लिइ अंक्षराङ्कन पद्धतिबाट नतिजा प्रकाशन हुन्छ ।
आधारभूत तथा माध्यमिक तहको शिक्षाका अधिकार स्थानीय तहमा रहे पनि परीक्षा व्यवस्थापनमा कक्षा ८ को परीक्षा व्यवस्थापन स्थानीय तहले गर्छ भने कक्षा १० र १२ को परीक्षा, परीक्षा बाेर्डबाट सञ्चालन र प्रमाणीकरण हुने गर्दछ ।विगतका तुलनामा गोदावरी भित्र सामुदायिक विद्यालयमा विद्यार्थी संख्या बढ्दो रहेको शिक्षा शाखा प्रमुख दीनानाथ पन्थीले जानकारी दिनु भयो।