ललितपुर - ललितपुरको बागमती गाउँपालिका अन्तर्गत रहेको श्री कालिदेवी माध्यमिक विद्यालयमा यस वर्षको एसईई परीक्षा २०८१ को सम्पूर्ण तयारी पूरा भएको छ। विद्यालयका प्रधानाध्यापक ठाकुर लामाका अनुसार आवश्यक पूर्वाधार, सुरक्षा व्यवस्था तथा परीक्षा सञ्चालन सम्बन्धी सबै तयारी सम्पन्न भइसकेको छ।
यस वर्ष कालिदेवी मावि परीक्षा केन्द्रबाट छ वटा विद्यालयका परीक्षार्थीहरू सहभागी हुँदैछन्। परीक्षामा नियमित तर्फ १४४ र ग्रेड वृद्धितर्फ ४७ जना गरी कुल १९२ जना परीक्षार्थी सहभागी हुनेछन्। कालिदेवी मावि माल्टाबाट नियमित ३६ र ग्रेड वृद्धि ६ गरी ४२ जना, नारायणी मावि गिम्दीबाट नियमित ३२ र ग्रेड वृद्धि १० गरी ४२ जना, विद्याधिश्वरी मावि आश्राङबाट नियमित २७ र ग्रेड वृद्धि ५ गरी ३२ जना, कालिदेवी मावि प्युटारबाट नियमित २७ र ग्रेड वृद्धि १६ गरी ४३ जना, जनक मावि गिम्दीबाट नियमित १४ र ग्रेड वृद्धि ८ गरी २२ जना तथा शारदा शिक्षा सदन मावि इकुडोलबाट नियमित ८ र ग्रेड वृद्धि ३ गरी ११ जना परीक्षार्थी सहभागी हुनेछन्।
परीक्षा चैत्र ७ गते बिहान ८:०० बजे बाट सुरु हुनेछ। परीक्षालाई मर्यादित र सुरक्षित बनाउन नेपाल प्रहरीले सुरक्षा व्यवस्था गर्नेछ। साथै, परीक्षा सहज रूपमा सम्पन्न गर्न सम्बन्धित विद्यालयका प्रधानाध्यापक, शिक्षक, अभिभावक, परीक्षा केन्द्र व्यवस्थापन समिति, समाजसेवी तथा स्थानीय सरकारका प्रतिनिधिहरूले आ-आफ्नो भूमिकामा जिम्मेवारी निर्वाह गर्नेछन्। बागमती गाउँपालिका अध्यक्ष वीरबहादुर लोप्चन, वडा नम्बर ४ प्युटारका वडा अध्यक्ष रामकुमार लामा थिङ, परीक्षा केन्द्र अध्यक्ष हेमन्त थापा, शिक्षा शाखा प्रतिनिधि दूधराज जिम्बा, आश्राङ प्रहरी चौकी प्रतिनिधि तथा अन्य सरोकारवालाहरूको उपस्थिति रहेको बैठकमा परीक्षा तयारीबारे आवश्यक निर्णय गरिएको थियो।
